Se jiftaħ IR-RABA’ KORS TAL-QARI TAL-PROVI

• Il-kors li jwassal għal Ċertifikat Universitarju fil-Qari tal-Provi kien suċċess u minnu diġà ħarġu bosta qarrejja tal-provi kkwalifikati.
• Ir-raba’ kors se jiftaħ dalwaqt u bħalissa qed jintlaqgħu l-applikazzjonijiet.
• Tagħrif iddettaljat dwar dan il-kors issibu hawnhekk.
• Jekk tixtieq tapplika għall-kors, iktbilna u nżommuk infurmat.
• Jekk se tippubblika xi ħaġa bil-Malti – avviż, fuljett, ktieb, kartellun – u trid isserraħ rasek li jkun bla żbalji, issa tista’ tqabbad qarrej tal-provi kkwalifikat. Bis-saħħa ta’ dan il-kors, l-ilsien Malti għall-ewwel darba għandu tim ippreparat ta’ qarrejja tal-provi tassew ikkwalifikati.
• Biex tikkuntattja lil xi ħadd minnhom, kulma trid tagħmel hu li tagħfas fuq din il-Lista tal-Qarrejja tal-Provi biċ-Ċertifikat.

L-UŻU TAL-MALTI FIL-KOMPJUTER

• Ġieli ridt tikteb bil-Malti fuq il-kompjuter imma sibt problema bl-ittri Maltin?
• Il-Kunsill tal-Malti għadu kif ħareġ dan il-manwal biex jgħinek tikteb id-dokumenti u l-ittri elettroniċi bil-Malti. Miktub b’mod dħuli u jiggwidak pass pass sakemm jirnexxilek tistalla t-tipi Maltin.
• Ħaġa tassew ħafifa... għax l-ittri Maltin diġà qegħdin għandek. Kulma trid hu li tattivahom.
• Jekk tixtieq kopja stampata, iktbilna kunsilltalmalti@gov.mt u nibagħtuhielek.

DEĊIŻJONIJIET ĠODDA FUQ IL-KITBA MALTIJA

• Id-deċiżjonijiet li xandar il-Kunsill tal-Malti f’Lulju li għadda biex inaqqas l-inċertezzi fil-kitba tal-Malti ntlaqgħu tajjeb ħafna u daħlu tista’ tgħid kull fejn il-kitba bil-Malti hija prominenti.
• Issa l-Kunsill ippubblika wkoll lista alfabetika tal-kliem li ttieħdet deċiżjoni dwaru, li hija komda ħafna għal min ikun irid jikkonsulta d-deċiżjonijiet bla telf ta’ ħin.
• Minkejja li l-forom li twarrbu se jibqgħu validi sa Lulju 2011, id-Deċiżjonijiet 1 diġà qed ikunu osservati bir-reqqa mill-ġurnalisti u x-xandara, mill-għalliema, mit-tradutturi tal-UE u mill-Knisja.
• Bħal kull ħaġa ġdida, xi wħud mid-deċiżjonijiet qajmu dibattitu san fil-gazzetti u fi programmi tar-radju u t-televiżjoni.
• Il-Kunsill sodisfatt li qed iservi bħala forum ta’ diskussjoni, kif ukoll li l-politika tiegħu ta’ konsultazzjoni wiesgħa qed tiġi apprezzata.
• Id-deċiżjonijiet saru uffiċjali fil-25 ta’ Lulju 2008 bil-pubblikazzjoni tagħhom fil-Gazzetta tal-Gvern (araha hawn).
• Jekk tixtieq tirċievi bil-posta d-Deċiżjonijiet 1 jew il-Lista Alfabetika tal-kliem li ttieħdet deċiżjoni dwaru, ibagħtilna l-indirizz tad-dar tiegħek hawnhekk: kunsilltalmalti@gov.mt.

Il-proċess li wassal għad-Deċiżjonijiet 1.

IL-KLIEM LI DIEĦEL FIL-MALTI MILL-INGLIŻ – Kif se niktbuh?

• Għal dawn diġà hemm regola, imma hija wiesgħa u vaga. Għalhekk sikwit naraw kitbiet dwar dan fil-gazzetti.
• Kif se niktbu: boiler... jew “boiler”... jew bojler? Boxing tippreferiha minn boksing... imma mbagħad ibboxja?
• Se nimxu sewwasew kif imxejna fil-varjanti, għax dal-metodu ħadem u ħadem tajjeb.
• Ħriġna Stqarrija għall-Istampa, biex kulħadd ikun mistieden jaħseb magħna u jikteb fehmtu.
• Il-ktibiet inġabru fi ktieb ġdid, li serva bħala Dokument għad-Diskussjoni u tista’ tarah hawnhekk.
• Fit-12 ta’ April 2008 sar seminar pubbliku, li għalih attendew ’il fuq minn 300 ruħ.
• Il-Kunsill tal-Malti qed jiżgura li ma jiddeċidix qabel ma jkun sema’ u wiżen il-fehma ta’ kull min xtaq jikkontribwixxi, biex id-deċiżjonijiet ikunu ttieħdu minna lkoll flimkien. Deċiżjonijiet tal-Maltin kollha.
• Inti għadek tista’ tibgħat il-fehma tiegħek dwar il-kliem li dieħel fil-Malti mill-Ingliż, biex tidher ukoll f’dan is-sit.
• Għandek iċ-ċans tagħti l-opinjoni tiegħek: titilfux.

IL-VARJANTI FONETIĊI

• Xogħol ieħor tal-Kunsill tal-Malti hu li jistudja l-problema tal-varjanti fonetiċi, jiġifieri każi fejn kelma waħda jkollha iktar minn pronunzja waħda fil-Malti Standard (eż. probabbiltà/probabilità, purċissjoni/proċessjoni). M’aħniex ngħidu għad-djaletti.
• Fi ftit każi, waħda biss mill-forom tkun tajba. Imma l-biċċa l-kbira ta’ dawn il-varjanti jkunu tajbin u juru l-varjetà lingwistika tal-Malti. Għalhekk ta’ min jibża’ għalihom.
• Madankollu, jibqa’ l-fatt li fil-prattika tal-kitba u fit-tiftix bil-kompjuter, il-varjanti jtellfu mhux ftit, l-aktar fejn tkun importanti l-uniformità.
• Huwa għalhekk li xi kumpaniji tat-traduzzjoni jew tal-pubblikazzjoni jiddeċiedu li jagħżlu dejjem forma partikolari u jwarrbu l-oħrajn, avolja jkunu tajbin.
• Il-Kunsill ġabar lista twila tal-varjanti fonetiċi u se jippreżentaha fil-ġimgħat li ġejjin biex kulħadd ikun jista’ jaraha.
• Jekk int tixtieq twasslilna fehmtek dwar dawn il-varjanti, tibqax lura. Iktbilna u tkun qed tgħin biex jittieħdu d-deċiżjonijiet meħtieġa.